१८ हजार ऊसतोड मजूर बीड जिल्ह्यात पोहोचले, उर्वरित दोन दिवसांत त्यांच्या गावी पोहोचणार

0
63
संग्रहित छायाचित्र.

मुंबई: राज्यात लागू असलेल्या संचारबंदीमुळे राज्यात विविध ठिकाणी अडकलेल्या ऊसतोड मजुरांपैकी जवळपास ९० टक्के मजूर आपापल्या गावी परतण्यासाठी मार्गस्थ झाले असून बीड जिल्ह्यातील १८ हजार मजूर आपापल्या गावी पोहोचले आहेत. उर्वरित सर्व ऊसतोड मजूर येत्या दोन दिवसात आपापल्या गावी पोहोचतील, अशी माहिती सामाजिक न्यायमंत्री तथा बीड जिल्ह्याचे पालकमंत्री धनंजय मुंडे यांनी दिली.

बीड जिल्हा सीमा प्रवेशाच्या चेकपोस्टवर अधिकृत नोंद झालेले १८ हजार ऊसतोड मजूर आपापल्या गावी परतले असून उदयगिरी शुगर्स बामणी जि. सांगली येथून परळीत आलेल्या १८ पैकी दोन व्यक्तींना ताप व घशात खवखव असे लक्षण आढळून आले. त्यांना तात्काळ आंबेजोगाई येथे कोरोना चाचणीसाठी (स्वॅब टेस्ट) पाठवले आहे. उर्वरित व्यक्तींचे परळी येथील डॉक्टर बाबासाहेब आंबेडकर वसतिगृह येथे संस्थात्मक अलगीकरण करण्यात आले आहे.

राज्यात विभागनिहाय पश्चिम महाराष्ट्र १ लाख २४ हजार, नागपूर विभाग ५ हजार, तर मराठवाड्यात जवळपास दोन हजार असे एकूण १ लाख ३१ हजार ऊसतोड मजूर अडकलेले असून काहीजण परतीच्या प्रवासात अडकलेले होते. त्यांपैकी आतापर्यंत १८ हजार ६७ मजूर गावी परतले आहेत.  त्यांना धान्यासह विविध सुविधा उपलब्ध करून देण्याच्या सूचना जिल्हाधिकाऱ्यांमार्फत स्थानिक प्रशासनाला देण्यात आल्या आहेत. स्थानिक प्रशासनासह मुंडे स्वतः व त्यांचे कार्यालय या बाबींवर बारीक लक्ष ठेवून आहेत.

दरम्यान, बाहेरून परतलेल्या ऊसतोड मजुरांना गावकरी व प्रशासनातील स्थानिक कर्मचाऱ्यांनी सन्मानाची वागणूक द्यावी. ऊसतोड मजुरांनी आपल्या कुटुंबातील वयोवृद्ध व्यक्ती व लहान मुले यांच्याशी जवळचा संपर्क टाळावा. स्थानिक प्रशासनाला सहकार्य करावे असे आवाहनही मुंडे यांनी केले आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा