देशात यंदा सरासरीच्या ९६ ते १०० टक्के पाऊस!

0
33

नवी दिल्लीः देशात येत्या पावसाळ्यात सर्वसाधारण पर्जन्यवृष्टी होईल, असा अंदाज आयएमडी म्हणजेच भारतीय हवामान विभागाच्या वतीने आज व्यक्त करण्यात आला. यंदा देशभरात सर्वसाधारण म्हणजे सरासरी ९६ टक्के ते १०४ टक्के पाऊस होईल, असा वेधशाळेचा अंदाज आहे. जून ते सप्टेंबर या काळात संपूर्ण देशात साधारणपणे जून ते सप्टेंबर अशा चार महिन्यांच्या कालावधीत नैऋत्य मोसमी वाऱ्यांमुळे पर्जन्यवृष्टी होत असते. आयएमडीने नैऋत्य मोसमी वाऱ्याच्या प्रवासाचा सविस्तर अभ्यास करून आणि दीर्घावधीच्या सरासरीचा विचार करून पहिल्या टप्प्यातला, हा अंदाज व्यक्त केला आहे.

भूविज्ञान मंत्रालयाचे सचिव डॉ. एम. राजीवन यांनी आज व्हिडिओ लिंकच्या माध्यमातून पत्रकार परिषद घेतली. त्यात भारतीय हवामान खात्याने नैऋत्य मोसमी पावसाविषयी केलेल्या दीर्घावधी अंदाजाविषयी माहिती दिली. यावेळी हवामान खात्याचे महासंचालक डॉ. एम. मोहापात्रा उपस्थित होते.

नैऋत्य मोसमी पावसाचा भारतात यंदा साधारणपणे कसा प्रवास असणार आहे, त्याची प्रगती कशी असेल तसेच पावसाचा परतीचा प्रवास कधी सुरू होणार आहे, याच्या अंदाजित नवीन तारखाही हवामान खात्याने जाहीर केल्या आहेत.

हवामान खात्याने केलेल्या दीर्घावधी सरासरी अभ्यासानुसार जून ते सप्टेंबर या काळात यंदा १०० टक्के पर्जन्यवृष्टी होईल. ज्या पद्धतीने वेधशाळा अभ्यास करते, त्याच्या अंदाजात साधारणपणे पाच टक्के फरक येण्याची शक्यता असते. असा अनुभव आहे. दीर्घावधी सरासरीचा विचार केला तर १९६१ ते २०१० या प्रदीर्घ काळात देशभरात सरासरी ८८ सेंमी पाऊस झाला आहे, असं डॉ. राजीवन यांनी म्हटलं आहे.

ही आनंदाची बातमीः संख्याशास्त्रीय पद्धतीने केलेल्या अभ्यासानुसार यंदा साधारण ९ टक्के कमी पर्जन्यवृष्टी होईल, असा अंदाज व्यक्त करण्यात आला आहे. ही आनंदाची बातमी आहे, असे राजीवन म्हणाले.

जूनच्या पहिल्या आठवड्यात दुसरा अंदाजः भारतीय हवामान खात्याच्यावतीने मे महिन्याच्या अखेरच्या सप्ताहात किंवा जूनच्या पहिल्या सप्ताहात दुसऱ्या टप्प्यातला अंदाज वर्तवण्यात येईल, असं यावेळी सांगण्यात आले.

मोसमी वारे चांगले वाहणारः पूर्वमध्य पॅसिफिक महासागरामध्ये समुद्री पृष्ठभागाचे तापमान तुलनेने सध्या थंड आहे, त्यामुळे मोसमी वारे चांगले वाहू शकतील परिणामी भारतात सर्वसाधारण पाऊस पडेल, असाही अंदाज आहे.

१ जून रोजी केरळमध्ये आगमनः यंदा १ जून रोजी केरळमधल्या तिरूवअनंतपुरम येथे देशात सर्वात प्रथम पावसाचे आगमन होईल. त्यानंतर टप्प्याटप्प्याने महाराष्ट्र, गुजरात, मध्य प्रदेश, छत्तीसगड, तेलंगणा, आंध्र प्रदेश, ओडिशा, झारखंड, बिहार आणि उत्तर प्रदेशचा काही भाग नैऋत्य मोसमी पावसाने व्यापला जाईल. सर्व साधारणपणे ३ ते ७ दिवस पावसाला उशिरा प्रारंभ होण्याची शक्यता आहे. तर १५ ऑक्टोबरच्या आसपास मोसमी पावसाचा परतीचा प्रवास सुरू होईल.

महाराष्ट्रात ९ ते १० जूनला आगमनः महाराष्ट्रात पुणे, कोल्हापूर, सातारा या जिल्ह्यांमध्ये ९ ते १०जून रोजी पावसाचे आगमन होण्याची शक्यता  आहे. तर गोव्यातील पणजीत यंदा पावसाचे आगमन ७ जून रोजी होईल, असा अंदाज आहे. नागपूर, जळगाव या भागात १५  ते १८  जून रोजी पावसाची पहिली हजेरी लागेल, असा पहिला अंदाज भारतीय हवामान खात्याने व्यक्त केला आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा