वीज खांबांपासून ३० मीटरच्या आतील कृषीपंपांना मिळणार २६ जानेवारीपर्यंत अधिकृत वीज जोडणी

0
190

मुंबईः  राज्यातील शेतकऱ्यांना कृषिपंपांसाठी वीज जोडण्या मिळाव्या म्हणून उर्जामंत्री डॉ. नितीन राऊत यांनी वीज खांबापासून ३० मीटरच्या आत असलेल्या सर्व अनधिकृत कृषिपंप वीज जोडण्यांना येत्या २६ जानेवारीपूर्वी अधिकृतपणे जोडण्या देण्याचे महत्वपूर्ण आदेश दिले आहेत. राज्यात जवळपास  ४ लाख ८५ हजार अनधिकृत कृषिपंप वीज जोडण्या असून यापैकी किमान ३० टक्के अनधिकृत जोडण्या या वीज खांबापासून ३० मीटरच्या आत आहेत. याशिवाय येत्या ३१ मार्चपर्यंत राज्यातील सर्वच अनधिकृत कृषिपंप वीज जोडण्यांना अधिकृत करण्याचा निर्णय उर्जामंत्री डॉ. नितीन राऊत यांनी घेतला आहे.

डॉ. नितीन राऊत यांनी काल मुंबईतील महावितरणचे मुख्यालय प्रकाशगड येथे उच्चपदस्थ अधिकाऱ्यांची बैठक घेतली. राज्य मंत्रिमंडळाने अलीकडेच मंजूर केलेल्या कृषिपंप धोरणाच्या अंमलबजावणीचा आढावा घेतला. या बैठकीस राज्याच्या उर्जा विभागाचे प्रधान सचिव आणि महावितरणचे अध्यक्ष व  व्यवस्थापकीय संचालक असीम गुप्ता, मराविमं सूत्रधारी कंपनीचे सल्लागार उत्तम झाल्टे यांच्यासह सर्व संचालक, प्रादेशिक संचालक यांची उपस्थिती होती.

हे निर्णय म्हणजे राज्यातील शेतकऱ्यांना नवीन वर्षाची एक अनमोल भेट असल्याचे मानले जात आहे. डॉ. राऊत यांच्या या आदेशामुळे कित्येक वर्षे महावितरणच्या कार्यालयात कृषिपंप वीज जोडणीसाठी खेटे घालणाऱ्या राज्यातील लाखो शेतकऱ्यांना फार मोठा दिलासा मिळाला आहे. कृषिपंप वीज धोरणास अलीकडेच मंजुरी मिळाली आहे. यानुसार दरवर्षी एक लाख कृषिपंपाना वीज जोडण्या देण्यात येणार असून या पंपांना योग्य दाबाचा पुरवठा मिळावा म्हणून पायाभूत सुविधांची निर्मिती करण्यासाठी दरवर्षी १५०० कोटी रुपयांची तरतूद करण्यात येणार आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा