लोणार सरोवराचे पाणी गुलाबी कशामुळे झाले? नमुन्यांची होणार शास्त्रीय तपासणी

0
40
संग्रहित छायाचित्र.

मुंबई : बुलडाणा जिल्ह्यातील लोणार सरोवराचे पाणी गुलाबी नेमके कशामुळे झाले याची शास्त्रीय पद्धतीने कारणमीमांसा करण्यासाठी पाण्याचे नमुने तपासण्यात येणार आहेत. या पाण्याचे  शास्त्रीय पद्धतीने नमुने घेण्यात आले आहे. हे सदर नमुने संशोधनासाठी नागपूर येथील राष्ट्रीय पर्यावरण व अभियांत्रिकी संशोधन संस्था (नीरी) तसेच पुणे येथील आगरकर संशोधन संस्थेकडे पाठवण्यात आल्याची माहिती वनमंत्री संजय राठोड यांनी दिली.

 हे अभयारण्य वन विभागाच्या अखत्यारीत आहे. ९ जून रोजी लोणार सरोवराचे पाणी गुलाबी रंगाचे झाले. लोणार सरोवर हे उल्कापाताने तयार झालेले असून जगातील ते वैशिष्ट्यपूर्ण सरोवर आहे. यातील क्षाराचे प्रमाण जास्त आहे. सरोवरातील पाण्यात विशिष्ट प्रकाराच्या हॅलो बॅक्टेरिया व शेवाळाच्या संयोगातून अशा प्रकारचे गुलाबी रंगाचे पाणी होत असावे, असे काही तज्ज्ञांचे मत आहे. तर काही तज्ज्ञांनी डुनलेलीया अल्गी व हॅलो बॅक्ट्रेरीया या जीवाणूमुळे बेटा कॅरोटीन रंगद्रव्य निर्माण झाल्याने लोणार सरोवराच्या पाण्याचा रंग गुलाबी होत असल्याचे मत व्यक्त केले. इराणमधील क्षारयुक्त सरोवरामध्ये अशा प्रकारे रंगात बदल झाल्याच्या घटना यापूर्वी झालेल्या आहेत. या पार्श्वभूमीवर चौकशी करण्यात येत असून अन्य कुठल्याही कृत्रिम घटकामुळे पाण्याचा रंग बदललेला नाही, अशी माहितीही राठोड यांनी दिली.

अकोला येथील वन्यजीव विभागाने लोणार सरोवराच्या पाण्याचे शास्त्रीय पद्धतीने नमुने घेण्यासाठी शंकरलाल खंडेलवाल महाविद्यालयचे डॉ.मिलींद शिरभाते यांना लोणार येथे पाठवले होते. त्यांनी गुलाबी रंगाच्या पाण्याचे व मातीचे नमुने गोळा करून वनविभागाकडे सादर केले आहे. पाण्यातील रंगबदल तपासासाठी सदर नमुने खास दुतामार्फत नागपूर येथील नीरी संस्थेकडे तसेच पुणे येथील आगरकर संशोधन संस्थेकडे पाठविले आहे.

असे आहे लोणार सरोवरः बुलडाणा शहराच्या दक्षिण पूर्व (आग्नेय) दिशेला ९० किमी अंतरावर लोणार गावालगत उल्कापातामुळे तयार झालेले एकमेव सरोवर आहे. हे सरोवर लोणार अभयारण्यांतर्गत येते. लोणार सरोवर हे बेसॉल्ट खडकातील हायपर व्हेलॉसिटी मेटीयोराईट इम्पॅक्टने तयार झालेले जगातील तिसऱ्या क्रमांकाचे खाऱ्या पाण्याचे सरोवर आहे. समुद्रसपाटीपासून त्याची उंची  ४६४.६३ मीटर असून खोली १५० मीटर आहे. त्याचा आकार अंडाकृती आहे. पूर्व-पश्चिम व्यास १ हजार ७८७ मीटर तर उत्तर-दक्षिण व्यास १ हजार ८७५ मीटर आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा