झूम ॲप वापरताय? ही घ्या खबरदारी!

0
118
प्रतिकात्मक छायाचित्र.

मुंबईः सध्या अनेकजण घरुन काम (वर्क फ्रॉम होम) करत आहेत. ऑनलाइन मिटिंगसाठी वापरायला सोपे असल्याने झूम या ऍपचा जास्त प्रमाणात उपयोग होत आहे. सायबर भामट्यांनी झूम ॲप सदृश काही मालवेअर व खोटे ॲप बनवले आहेत. त्यामुळे हे ॲप वापरताना सावधानता बाळगणे आवश्यक आहे, असे आवाहन महाराष्ट्र सायबरने केले आहे.

आपल्या सहकाऱ्यांबरोबरच्या ऑनलाइन मिटिंगसाठी झूम, मायक्रोसॉफ्ट मिटिंग, स्काईप, सिस्को वेबेक्स आदी सॉफ्टवेअर आणि ॲप्स वापरली जात आहेत. झूम त्यामध्ये वापरायला सोपे असल्याने या सॉफ्टवेअरचा जास्त प्रमाणात उपयोग होत आहे.

सायबर भामट्यांनी बनवलेले झूम ॲप सदृश काही मालवेअर जर डाऊनलोड केले, तर तुमच्या सर्व मिटिंग रेकॉर्ड होतील व तुमची सर्व माहिती त्यांना मिळू शकते व तुमच्या मोबाइल किंवा संगणकाचा ताबादेखील हे सायबर भामटे घेऊ शकतात. महाराष्ट्र सायबरने सर्व नागरिकांना विशेष करून झूम ॲप वापरणाऱ्यांना हे ॲप वापरताना सावध राहण्याचे आवाहन केले आहे.

झूम ॲप हे अधिकृत वेबसाईट किंवा प्लेस्टोअरवरूनच डाउनलोड करावे. शक्यतो कुठलीही गोपनीय माहिती अशा मिटिंगमध्ये बोलणे टाळावे किंवा संबंधित लोकांशी थेट बोलूनच त्यांना ही माहिती द्यावी. मिटिंग ॲडमिनने मिटिंगचे आयडी व पासवर्ड हे शक्यतो संबंधित व्यक्तींनाच थेट कळवावेत. सदर पासवर्ड हा थोडा क्लिष्ट ठेवावा, जेणेकरून एखाद्या दुसऱ्या व्यक्तीस तो समजण्यास कठीण जाईल. तसेच संबंधित मिटिंग ॲडमिन/होस्टने फक्त मिटिंगच्या विषयाच्या संबंधित व्यक्तींचीच लॉगिन रिक्वेस्ट स्वीकारावी.

पुढील बाबी लक्षात ठेवाः तुम्ही जर मीटिंग होस्ट असाल तर पुढील बाबी लक्षात ठेवणे गरजेचे आहे.
१) तुम्हाला जो रँडम मिटिंग आयडी व पासवर्ड मिळेल त्याचाच शक्यतो वापर करा, तुमचा कुठलाही आयडी किंवा पासवर्ड वापरू नका.
२) तुम्ही मिटिंग सेटिंग अशा प्रकारे बदल करा की तुमच्याशिवाय मिटिंगमधील अन्य कोणीही व्यक्ती ती रेकॉर्ड करू शकणार नाही.
३) मिटिंग मध्ये सर्व अपेक्षित व्यक्तींनी लॉगिन केल्यावर सदर मिटिंग लॉक करा जेणेकरून अन्य कोणी व्यक्ती त्यात अनाहूतपणे लॉगिन करू शकणार नाही.
४) मिटिंग सेटिंग अशी करा की तुमच्या आधी व तुमच्या परवानगीशिवाय कोणी त्यात लॉगिन करू शकणार नाही.
५)तुम्ही जर काही कारणाने मिटिंग सोडून जात असाल किंवा मिटिंग संपली असेल तर लीव्ह मिटिंगचा पर्याय न वापरता एंड मिटिंगचा पर्याय वापरा.
६) मिटिंगची लिंक आयडी व पासवर्ड ओपन फोरमवर शेअर करू नका.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा