महाराष्ट्रातील वाहन प्रमाणिकरण केंद्रे आणि चालक चाचणी ट्रॅकसाठी 296 कोटी मंजूर

0
24

नवी दिल्ली : महाराष्ट्रातील 10 स्वयंचलित वाहन तपासणी व प्रमाणिकरण केंद्रे आणि 22 स्वयंचलित चालक चाचणी ट्रॅकसाठी 296.02 कोटी रूपयांचा निधी  केंद्र सरकारने मंजूर केला आहे, अशी माहिती राज्याचे परिवहन मंत्री ॲङ अनिल परब यांनी आज येथे दिली.

परिवहन भवन येथे केंद्रीय परिवहन मंत्री नितीन गडकरी यांची परब यांनी भेट घेतली. या बैठकीत राज्य सरकारतर्फे 10 स्वयंचलित वाहन तपासणी आणि प्रमाणिकरण (AVI&C) केंद्रासाठी 139.80 कोटी तर 22 स्वयंचलित चालक चाचणी ट्रॅक (ADTT) साठी 156.22 कोटी रूपयांचा प्रस्ताव सादर करण्यात आला. या प्रस्तावास केंद्रीय मंत्री गडकरी यांनी मान्यता दिल्याचे बैठकीनंतर परब यांनी सांगितले.

पहिल्या टप्प्यात 10 स्वयंचलित वाहन तपासणी आणि प्रमाणिकरण केंद्रे :महाराष्ट्रात पहिल्या टप्प्यात राज्यातील विविध भागात 10 स्वयंचलित तपासणी आणि प्रमाणिकरण केंद्र उभारली जातील. ही केंद्र कोल्हापूर, औरंगाबाद, अमरावती, ठाणे (कल्याण), नागपूर (ग्रामीण), मुंबई (सेंट्रल), हिंगणघाट (नागपूर), पनवेल, दिवेघाट (पुणे), नांदेड या ठिकाणी उभारण्यात येणार आहेत.

राज्यातील विविध भागात एकूण 50 वाहन तपासणी आणि प्रमाणिकरण केंद्र उभारली जाणार आहेत. त्यापैकी 10 केंद्र सुरू करण्यात येणार आहेत. यासाठी ऑटोमोटिव्ह रिसर्च असोसिएशन ऑफ इंडिया, पुणे यांच्याकडून तांत्रिक सहाय्य घेतले जाणार आहे. यापैकी  मुंबई ईस्ट-कुर्ला येथे महाराष्ट्र राज्य रस्ते वाहतूक मंडळाच्या जागेवर  बांधकाम सुरू आहे. नाशिक येथे पथदर्शी प्रकल्पातंर्गत स्वयंचलित वाहन तपासणी आणि प्रमाणिकरण केंद्र 2015 मध्ये सुरू करण्यात आलेले आहे.22 मानवरहित ‘स्वयंचलित चालक चाचणी ट्रॅक : राज्यात 22 ठिकाणी मानवरहित ‘स्वयंचलित चालक चाचणी ट्रॅक सुरू करण्यात येणार असून यासाठी 156.22 कोटी रूपये खर्च करण्यात येणार आहेत. हे ट्रॅक संपूर्ण संगणकीकृत राहतील. यासंदर्भात सेंट्रल इन्स्टिट्यूट ऑफ रोड ट्रान्सपोर्ट यांना प्रस्ताव पाठविला असल्याचे परब यांनी सांगितले.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा